Reykjanesviti á suð-vestanverðu Reykjanesi

Bláa Lónið hefur kostað og framkvæmt stærsta hluta verkefnisins, sem unnið er í samstarfi við Reykjanes Jarðvang (Reykjanes Unesco Global Geopark), Hollvinasamtök Reykjanesvita og Vitavörðinn ehf. Með samningi við eigendur vitavarðarhússins, Vitavörðinn ehf. um endurgerð vitavarðarhússins, hefur Bláa Lónið byggt upp áðurnefnda þjónustuaðstöðu á jarðhæð þess með nýjum viðtengdum skála, salernum og upplýsingapalli. Einnig gert góð bílastæði á móti gestastofunni.

Á pallinum hefur verið komið fyrir upplýsingaskiltum um það helsta sem ber fyrir augu frá frábærum útsýnisstað við vitavarðarhúsið. Skiltin voru gerð af Reykjanes Geopark en BL sá um uppsetningu þeirra.

Leiðarljós að Lífhöfn

Hollvinasamtök Reykjanesvita hafa staðið að uppsetningu sýningar í litlu húsi austan við gestastofuna. Það er í svonefndu vélahúsi, sem er notað til að knýja ljósavélar ef rafmagn fer af vitanum. Sýningin nefnist „Leiðarljós að Lífhöfn“ og lýsir afdrifum hundruða skipverja, skipa og báta sem hafa lent í sjávarháska við Reykjanesið.

Á opnunartíma Þjónustumiðstöðvar og sýningar er íslenski fáninn reistur við hún á Flaggstangarhól, sunnan við vitavarðarhúsin.