Duus safnahús

Önnur nálgun

Náttúra Reykjanessins er einstök. Oddgeir og Sossa hafa hér fangað sérkenni Suðurnesja/Reykjanessins í sitthvorn miðilinn, með áherslu á liti og fjölbreytileika umhverfisins út frá sitthvoru listrænu sjónarhorninu - Ljósmyndarinnar og Málverksins.  

Um er að ræða samvinnuverkefni listmálarans Sossu Björnsdóttir og ljósmyndarans Oddgeirs Karlssonar – og eins og nafn sýningarinnar vísar til, þá nýta þau sitthvorn miðilinn til að túlka viðfangsefnið. Þau Sossa og Oddgeir haft hvort um sig , starfað við fag sitt í ára tugi á Suðurnesjum og leiðir þeirra legið saman á ýmsum sviðum. Náttúran hefur alla tíð verið viðfangsefni beggja, en segja má að hugmynd að þessari samvinnu hafi kviknað haustið 2023, þegar þau uppgötvuðu, að þau áttu bæði 30 ára útskriftarafmæli frá listaháskólum í Bandaríkjunum. 

Fjölskyldusmiðja í Duus safnahúsum

Í bíósal Duus safnahúsa getur fjölskyldan komið saman og átt rólega og notalega stund. Í salnum eru verk eftir myndlistakonuna Sossu Björnsdóttir og ljósmyndarann Oddgeir Karlsson. Horfðu á listaverkin í kringum þig. Hvað sérð þú? Búðu til þitt eigið listaverk en á staðnum verður allskyns efniviður sem hægt er að nota.

Gestastofa Reykjanessjarðvangs, UNESCO Global Geopark

Sýning um myndun og mótun Reykjanesskagans. Gestir geta fræðst um jarðfræði og náttúrufar á skaganum á einfaldan og aðgengilegan hátt. Markmiðið með gestastofunni er að miðla fróðleik og upplýsingum um Reykjanes jarðvang og Reykjanesskaga. Í tilefni þess að 50 ára afmælissýning HS Orku hefur verið sett upp í rými gestastofunnar hefur sýning gestastofunnar verið uppfærð og því um að gera að líta við og skoða báðar sýningar.

50 ár af framförum. Sögusýning HS Orku

Í árslok verða 50 ár liðin frá stofnun Hitaveitu Suðurnesja, forvera HS Orku. Af því tilefni býður HS Orka íbúum Reykjanesbæjar til afmælissögusýningar í Gryfjunni í Duus safnahúsum. Á sýningunni, sem hönnuð er í samstarfi við Gagarín, er dregin upp mynd af einstakri frumkvöðlahugsun og framsýni, sem fylgt hafa fyrirtækinu í hálfa öld.

Skemmtilegur Skessubæklingur

Skessan í hellinum er vinur allra og ljúfasta tröll sem til er og henni finnst fátt skemmtilegra en að fá heimsókn frá börnum. Hún er með sérstakt snuddutré í hellinum sínum og því er tilvalið að koma við og gefa Skessunni fleiri snuddur til að gera fallegt í hellinum. Hún vill svo endilega að þið takið myndir af börnunum ykkar í stóra sólstólnum fyrir utan hellinn eða ofan skessuskónum hennar eða uppi í risastóra rúminu hennar. Nú getið þið fengið glænýjan Skessubækling í Duus safnahúsum með alls kyns skemmtilegum þrautum og veggspjaldi með mynd af Skessunni.